
खानापूर तालुक्यात म ए समितीच्या नावे कार्यरत असणाऱ्या दोन्ही गटांशी चर्चा करुन एकिची प्रक्रिया पुढे नेण्यासाठी सोमवार दि.७ रोजी सकाळी ११ वा. शिवस्मारकातील सभागृहात मध्यवर्ती म ए समिती प्रतिनिधींच्या उपस्थितीत बैठक बोलाविण्यात आली आहे.
गर्लगुंजी येथील माऊली ग्रुप आणि तालुक्यातील ६१ निष्ठावंत कार्यकर्त्यानी शनिवार दि.५ नोव्हेंबर रोजी एकी संदर्भात मध्यवर्तीचे अध्यक्ष दीपक दळवी, खजिनदार प्रकाश मरगाळे, कार्याध्यक्ष माजी आ. मनोहर किणेकर, सरचिटणीस मालोजी अष्टेकर आदिंची भेट घेतली. अध्यक्ष दिपक दळवी यांच्या निवासस्थानी कार्यकर्त्यांनी भावना व्यक्त केल्या. तालुक्यातील सीमा चळवळीची स्थिती, मराठी भाषा संस्कृती वर होणारे आक्रमण, राजकीय स्थिती तसेच संघटनेची होणारी पिछेहाट यावर प्रामुख्याने चर्चा झाली. त्यानंतर त्यांना निवेदन देण्यात आले.
सोमवारी होणाऱ्या बैठकीत तालुक्यातल्या दोन्ही गटांशी चर्चा करुन निर्णय घेण्यात येणार आहे. त्याकरीता दोन्ही गटातील समिती नेते आणि कार्यकर्त्यांनी बैठकीला उपस्थित राहावे, असे आवाहन माऊली ग्रुप आणि समितीनिष्ट कार्यकर्त्यानी केले आहे.
