
खानापूर : ‘बेळगाव,कारवार, निपाणी, खानापूरसह संयुक्त महाराष्ट्र झालाच पाहिजे’च्या जयघोष करीत सहभागी झालेल्या हजारो कार्यकर्त्यांनी रविवारी खानापूर शहर दणाणून सोडले. हातात भगवेध्वज, डोकीवर फेटे आणि कपाळावर शेंदूर लावून मराठी भाषिक रॅलीमध्ये सहभागी झाले होते, त्यामुळे शहर जणू भगवेमय झाले होते. कार्यकर्त्यांचा प्रचंड उत्साह विरोधकांना धडकी भरविणारा होता. शहरातील विविध गल्ल्यांमध्ये मुरलीधर पाटील यांचे उस्त्फुर्द स्वागत करून विजयी करण्याचा वज्रनिर्धार करण्यात आला.
गावागावातून समितीला उत्स्फूर्त प्रतिसाद मिळत असल्याच्या पार्श्वभूमीवर शहरातील विविध मंडळांनी पाठींबा दर्शवित रॅलीत सहभाग दर्शविला होता. जांबोटी क्रॉस येथून रॅलीला सुरूवात झाली. त्यानंतर शहरातील विविध गल्ल्यांमधून प्रचारफेरी काढण्यात आली. प्रचंड गर्दीमुळे ही प्रचारफेरी लक्षवेधी ठरली. प्रचारफेरीदरम्यान महिलांनी मुरलीधर पाटील यांना आरती करून त्यांचे औक्षण केले. तर ठिकठिकाणी त्यांना नागरीकांनी निवडणुकीतील विजयासाठी शुभेच्छा देत पाठींबा दर्शविला. खानापूर शहरात मराठी भाषिकांची संख्या अधिक असून, येथील मतदारांनी म.ए.समितीच्या पाठीशी राहून प्रचंड मताधिक्याने निवडून देण्याचा निर्धार यावेळी व्यक्त करण्यात आला. प्रचारफेरी जांबोटी क्रॉस, बाजारपेठ, घाडी गल्ली, गुरव गल्ली, देसाई गल्ली, निंगापूर गल्ली येथून स्टेशन रोडवर आल्यानंतर खेड्यापाड्यातून आठवडी बाजारासाठी आलेल्या नागरीकांनीही प्रचारफेरीत उस्त्फुर्दपणे सहभाग घेतला. तसेच हजारो लोक रस्त्याच्या दुतर्फा उभे राहून मुरलीधर पाटील यांचे समर्थन करतांना दिसत होते.
निंगापूर गल्लीवासीयांनी यावेळी मुरलीधर पाटील यांना १०० टक्के पाठींबा जाहीर करीत जागृत चव्हाटा देवस्थानासमोर गाऱ्हाणा घालून विजयासाठी साकडे घातले. प्रचारफेरीत महाराष्ट्र एकीकरण समितीचे नेते-कार्यकर्ते आणि शहरातील विविध मंडळांचे पदाधिकारी आणि कार्यकर्त्यांनी सहभाग घेतला होता. रॅलीतील महिला आणि तरूणांचा सहभाग लक्षणिय होता. एकंदर, आजच्या प्रचारफेरीने खानापूरचे वातावरण भगवेमय व समितीमय झाले होते.
अबालवृध्दांचे समर्थन
प्रचारफेरी शहरातून जात असतांना प्रत्येक गल्लीत वृध्द आणि जाणत्यांकडून मुरलीधर पाटील यांना समर्थन दिले जात होते. तसेच लहान मुलेदेखील हात उंचावून कार्यकर्त्यांचा उत्साह वाढवित होती. एकुणच शहर भगवेमय झाले होते.
