महेंद्रकुमार मुधोळकर, बीडः राष्ट्रवादी काँग्रेसचे (NCP) आमदार आणि माजी मंत्री धनंजय मुंडे हे परळीतून लातूर आणि त्यानंतर मुंबईकडे रवाना झाले आहेत. काल परळीत त्यांच्या कारला भीषण अपघात झाला. अपघातात त्यांच्या छातीला आणि डोक्याला दुखापत झाली आहे. पुढील उपचारांसाठी त्यांना मुंबईला हलवण्यात आलंय.
धनंजय मुंडे यांच्या गाडीला मंगळवारी रात्रीच अपघात झाला. मात्र सकाळपर्यंत याची फारशी माहिती बाहेर आलेली नव्हती.सकाळी 10 वाजेच्या सुमारास अपघाताची माहिती मिळाल्यानंतर धनंजय मुंडे यांचंच ट्विट आलं. त्यांनी काल झालेल्या अपघाताची माहिती दिली.
परळीत रात्री साडे बारा वाजेच्या सुमारास त्यांचा अपघात झाला. अपघातात किरकोळ दुखापत झाली असून डॉक्टरांनी विश्रांतीचा सल्ला दिला आहे, अफवांवर विश्वास ठेवू नका, असं ट्विट धनंजय मुंडे यांनी केलं होतं.धनंजय मुंडे यांना किरकोळ दुखापत झाल्याचे म्हटले जात असले तरीही या अपघातातून लवकर सावरण्यासाठी त्यांना पुढील उपचारांसाठी मुंबईला रवाना करण्यात आलं.
परळीतून लातूर आणि लातूरमधून त्यांना एअर अँब्युलन्सद्वारे मुंबईच्या ब्रिज कँडी रुग्णालयात दाखल केलं जाणार आहे.धनंजय मुंडे यांच्या अपघाताची माहिती मिळाल्यानंतर परळीत त्यांच्या घराबाहेर कार्यकर्त्यांची गर्दी जमायला सुरुवात झाली होती. पण लातूरकडे रवाना होईपर्यंत मुंडे यांना कुणाचीही भेट घेण्याची परवानगी देण्यात आली नव्हती.अखेर दुपारी १२.३० वाजण्याच्या सुमारास त्यांना घरातून बाहेर काढण्यात आलं. यावेळी त्यांच्या डोक्याला पांढऱ्या रंगाचा गमजा गुंडाळलेला होता. तर अंगाभोवती करड्या रंगाची शाल गुंडाळलेली होती.
- Advertisement -
