आमदार राजेश पाटील यांनीही दुर्घटनेला जबाबदार असणाऱ्या कर्मचारी व अधिकाऱ्यावर गुन्हे दाखल करावेत अशी मागणी केली आहे.
चंदगड / प्रतिनिधी
चंदगड तालुक्यातील बुक्कीहाळ बुद्रुक येथे आपल्या शेतामध्ये बैलाने उसामधील सऱ्या फोडत असताना बांधावर असलेल्या वीज खांबाच्या ओढणीचा शॉक लागून 21 वर्षीय तरुणाचा दुर्दैवी मृत्यू झाला.शुक्रवारी दुपारी तीन वाजता ही घटना घडली.
घटनेतील मयत संपत सुरेश बच्चनहट्टी आपल्या शेतामध्ये बैलाने ऊस सरी फोडत असतांना बांधावर असलेल्या खांबाच्या ओढणीला स्पर्शझाल्याने जागीच मृत्यू झाला. बुक्कीहाळ फाटा ते बुक्कीहाळ बुद्रुक या मार्गावर सदर घटना घडली.बैल जोडीने शेत नांगरत असतांना तरुणाला 1100 व्होल्टचा वीज धक्का बसला.त्याच्या पश्चात आई,वडील,मोठा भाऊ, दोन बहिणी आहेत.
गतवर्षी या लाईनवर दुसऱ्या खांब्याशेजारी मृत तरुणाच्या दोन म्हैशींचा असाच मृत्यू झाला होता.मेलेल्या म्हैशींची नुकसान भरपाई अद्याप त्याच्या कुटुंबीयांना मिळालेली नाही. या घटनेनंतर ग्रामस्थ संतप्त झाले. यानंतर सायंकाळी पावणे सात वाजता चंदगडचे वीज वितरणचे मुख्य अभियंता विशाल लोधी व त्यांचे पथक आले होते.मात्र त्यांनी पंचनामा उद्या होईलअसे सांगितल्यानंतर ग्रामस्थ संतप्त झाले. प्रा. यल्लाप्पा पाटील, परशराम कोकीतकर, राम ढबळे, इराप्पा पाटील, गीतेश वरगे, भरमा पाटील यांचेसह गावातील शेकडो तरुण व नागरिकांनी पंचनामा आजच करा, या मागणीवर ग्रामस्थ अडुन बसले. सायंकाळी 6.45 वाजता आलेले वीज वितरणचेचे अधिकारी विशाल लोधी यांची गाडी रात्री बारा वाजेपर्यंत अडवून ठेवण्यात आली होती.रात्री बारा वाजता कोल्हापुरातून इलेक्ट्रिक इन्स्पेक्टर युवराज वाघ आल्यानंतर पंचनामा करण्यात आला. यानंतर अधिकाऱ्यांची गाडी ग्रामस्थांनी सोडली.दरम्यान वीजवितरणचे निवृत्त अधिकारी विष्णू जोशीलकर यांच्यासह कागणी येथील सामाजिक कार्यकर्ते नरसिंग बाचूळकर, जनार्दन देसाई, पोलीस पाटील, सट्टूप्पा मेनसे यांनीही ग्रामस्थांना समजावण्याचा प्रयत्न केला. मात्र ग्रामस्थ आपल्या निर्णयावर ठाम होते.शिवसेनेचे राजू रेडेकर व स्वाभिमानी शेतकरी संघटनेचे दीपक पाटील यांनी घटनास्थळी भेट देऊन नुकसान भरपाई मिळवून देण्यासाठी प्रयत्न करणार असल्याचे सांगितले. त्या तरुणावर रात्री १२ वाजता अंत्यसंस्कार करण्यात आले.विद्युत महामंडळाच्या हलगर्जीपणामुळे हा अपघात झाल्याची चर्चा परिसरात आहे.या घटनेमुळे बुक्क्याहाळ गावावर शोककळा पसरली आहे
